ОДРЖАН ДВОДНЕВЕН „ОНЛАЈН“-СЕМИНАР ЗА ИТ-БЕЗБЕДНОСТ И ЗА ЗАШТИТА НА ПОДАТОЦИ

Во услови на сѐ поголема употреба на дигиталните технологии во работењето, особено за време на светската пандемија кога голем дел од организациите се одлучија да овозможат работа од дома, се појавува потребата од зголемена безбедност на мрежите и на податоците со кои располага организацијата. Застојот во работењето е непожелно решение, па затоа од особена важност за една организација e да реагира соодветно, бргу и ефикасно, во согласност со претходно утврден план за санирање на секој проблем и за избегнување непожелни ситуации, обезбедувајќи професионализам и безбедност за компанијата и континуитет во работењето со клиентите. Без разлика дали станува збор за природна катастрофа или за последица од човечки фактор, потребно е секоја организација да поведе сметка и да ги заштити податоците за да не се доведе во ситуација која го нарушува имиџот, го намалува кредибилитетот на организацијата и влијае врз довербата на корисниците. Хакирањето сајтови стана честа појава, па добрата заштита и резервите на податоците се од суштинско значење за брзо надминување на кризните ситуации.

За таа цел, Стопанската комора на Македонија организираше дводневен „онлајн“-семинар на тема „ИТ-КАТАСТРОФИ И КОНТИНУИТЕТ ВО РАБОТЕЊЕТО“, чија цел беше воведување на менаџерите за информациски технологии во креирањето планови, тестирањето и во навремената заштита од отежнато функционирање или од целосно прекинување на работењето.

Предавач на семинарот беше Лука Милинковиќ, ИТ-ревизор во „НЛБ банка“ Белград, одговорен за информациска и за апликативна контрола. Милинковиќ има повеќегодишно искуство со контрола и со управување со ИТ-ризици, со специјализација во областа на дефинирањето ИТ-процеси (ITIL-процеси) и на примена на самата контрола.

Овој дводневен „онлајн“-семинар беше од практичен карактер, при што учесниците имаа можност да научат како да спроведат анализа на влијанието на работењето (BIA) и како да креираат планови и тестирања кои би довеле до полесно заздравување од катастрофите.

Стопанската комора на Македонија, преку Центарот за едукација и развој на човечки ресурси, активно ги следи барањата и потребите на компаниите, како и трендовите поврзани со новите технологии, сѐ во насока на навремено презентирање на новините пред претставниците од јавниот и од приватниот сектор и на континуирано унапредување на работењето.

• Breaking
• Events
• Internship