ПЕХАР ЗА УЧЕНИЦИТЕ ТОМЧЕ СТОЈКОСКИ И ЈАСМИН ЗЕЌИРОСКИ ОД СОУ „НАУМ НАУМОВСКИ – БОРЧЕ“, КРУШЕВО ПОД МЕНТОРСТВО НА ПРОФЕСОРКАТА ОЛИВЕРА КАРЕВА СКОЛА НА МЕЃУНАРОДНИОТ ГАСТРОНОМСКИ ФЕСТИВАЛ ВО ХРВАТСКА

На меѓународниот гастрономски фестивал и кулинарски натпревар „Бисер на морето“ (Бисер мора) што се одржува по 17-ти пат во Супетар, на островот Брач, Република Хрватска, учениците од СОУ „Наум Наумовски Борче“ од Крушево, Томче Стојкоски (IV клас) и Јасмин Зеќироски (III клас) под менторство на професорката Оливера Карева Скола го освоија второто место во категоријата тимско натпреварување во подготовка на предјадење, главно јадење и десерт.  Во подготовките за учеството на натпреварот беше вклучен и Христијан Јорданоски, поранешен ученик на СОУ „Наум Наумовски Борче“, денес успешен гастроном, што покажува дека стручното образование е пасош за животот на младата единка, a финансиската помош за учество на натпреварот беше обезбедена од угостителските објекти: ресторан „Шапе“ Крушево, ресторан „Алтан“, Прилеп и хотел „Салида“ Прилеп, социјални партнери на училиштето, во кои учениците ја реализираат практичната обука. За учениците ова е пријатно искуство да се запознаат со врвни мајстори на гастрономијата и да ја имаат можноста за дегустација на храна со различна традиција, и со различни вкусови и бои доведени до совршенство.

Училиштето „Наум Наумовски-Борче“ на меѓународниот гастрономски фестивал „Бисер на морето“ учествува од 2011 година и секоја година, учениците беа меѓу наградените, во првите три места. Во 2019 година, на овој фестивал, учениците Бојан Седлоски и Давид Трајкоски под менторство на професорите Оливера Карева Скола и Љупчо Крстевски, го освоија првото место.

„Бисер на морето“ е гастрономски фестивал и кулинарски натпревар на професионални готвачи, слаткари, пица мајстори, како и на средни угостителски училишта и факултетите за туризам. Фестивалот оваа година се одржа од 8 до 12 април во организација на  Здружението на готвачи од медитеранските и европските региони (ШКМЕР).

На гастрономскиот фестивал „Бисер на морето“ се напреваруваат повеќе од 200 готвачи од над 20 земји, а е посетен од  илјада посетители, професионалци во гастрономијата.