РАСТЕ ИНТЕРЕСОТ ЗА УПИС ВО СТРУЧНИТЕ УЧИЛИШТА

Оваа учебна година во СЕТУГС „Mихајло Пупин“, Скопје се формираа 10 паралелки, 2 паралелки повеќе во споредба со минатата учебната година, што покажува дека расте интересот за упис на деветтоодделенците во стручните училишта.  Училиштето е едно од пионерите кои го имплементираа дуалниот модел на образование во нашата земја во соработка со компанијата „ЕВН Македонија“, преку познатиот проект „20-20-20“, за квалификациите Електричар електромонтер на електроенергетски мрежи и Електротехничар – енергетичар. Минатата година, во „ЕВН Македонија“, беше вработена првата генерација на средношколци од СЕТУГС „Mихајло Пупин“ кои се образуваа и обучуваа преку овој проект. Со текот на годините, училиштето со поддршка на Стопанската комора склучи соработка и со други компании за реализација на дуалниот модел на образование, затоа што дуалните паралелки нудат големи поволности, односно овозможуваат учениците да ги потврдуваат и применуваат теоретските знаења преку практична настава во компаниите.

Училиштето располага со кабинети, лаборатории и работилници за реализација на практичната настава и за вежбите по стручните предмети за квалификациите кои ги нуди (кабинети за програмирање, кабинет за информатика и компјутерска техника, кабинет за 3Д-моделирање, лабораторија за автоматика и роботика и две лаборатории по електроника, лабораторија по електротехника, лабораторија за енергетска ефикасност на објекти, лабораторија за интелигентни електрични инсталации, лабораторија за електрични мерења, како и полигон во дворот на училиштето, опремен со сите потребни нагледни средства за откривање, симулација и отстранување дефекти на електродистрибутивната мрежа). „ЕВН Македонија“ помогна во опремување на училишната работилница и училници за квалификациите Електричар електромонтер на електроенергетски мрежи и Електротехничар – енергетичар.

Оваа учебна година на обуката за спроведување на програмата за ученичкa компанија на „Џуниор Ачивмент Македонија“, што се одржа во септември, професорите Aња Манчевска и Сенад Сејфиќ од СЕТУГС „Михајло Пупин“ ги освоија првите места за идејно решение поврзано со формирање ученичка компанија.

СЕТУГС „Михајло Пупин“ е и меѓу првите училишта што почнаа револуција во енергетската ефикасност. Училиштето има фотоволтаична централа со инсталирана моќност од 12kW, поврзана со електродистрибутивната мрежа, која се користи за напојување на компјутерите, осветлување и за задоволување на други потреби на училиштето.