МАКЕДОНСКИТЕ АМБАСАДОРИ ВО НАУКАТА

Знаењето е вредност што ја поседува една личност и никој неможе лесно да го одземе. Но вредноста на знаењето ќе биде уште поголема кога тоа ќе има своја употребна вредност. Тоа го покажаа нашите средношколци кои на светските и европските олимпијади освоија златни, сребрени и брозени медали и својата држава ја ставија да биде една од еднаквите во светот. Тие станаа амбасадори на Македонија.

Златниот медал за Македонија, го освои младиот генијалец Јан Стојановски, ученик во ПСУ „Јахја Кемал„ Скопје, на 8-мата Европската олимпијада по физика, која се одржа од 15 до 19 јули 2024 година во Кутаиси, Грузија, на која учествуваа 54 држави и тоа -36 држави од Европа и 18 држави надвор од Европа.

Тимот беше предводен проф. д-р Ирина Петреска, редовен професор на ПМФ во Скопје и м-р Христијан Кочанковски, асистент на ПМФ во Скопје, а организатори за учеството беше Друштвото на физичари на Република Македонија.

Досега Јан Стојановски има освоено сребрен медал на 7-мата Европска олимпијада по физика во Хановер, Германија и бронзен медал на 53-тата Меѓународна олимпијада по физика во Токио, Јапонија во 2023 година и златен медал на 5-тата Балканска олимпијада по физика во Никозија, Кипар во 2022 година.

На Олимпијадата покрај Јан Стојановски, награди за успешно учество (пофалници) добија и Матеј Гелев, ученик во ПСУ „Јахја Кемал“, Скопје; Емилија Николовска, ученичка во Математичко-информатичката гимназија, Скопје и Димитриј Анѓеловски ученик во СУГС „Јосип Броз Тито“,  Скопје.

Златниот медал на престижната математичката олимпијада „Коперникус“ која се одржа на Универзитетот Колумбија во Њујорк, го освои Дарјан Мирцевски, од основното училиште „Јаја Кемал“, Скопје, во конкуренција од 60 финалисти од 34 земји во светот.

Сребрен медал освои Петар Мирчевски, ученик во гимназијата „Мирче Ацев“, Прилеп, а со бронзен медал се закити Марио Ванчоски, ученик во  гимназијата „Славчо Стојменски“, Штип, на 56-тата Меѓународна олимпијада по хемија (IChO 2024), што се одржа на крајот на јули, во Ријад, Саудиска Арабија, во конкуренција од 350 ученици од 90 држави од целиот свет. Натпреварот се состои од два дела во времетраење од 5 часа – теоретски и експериментален дел кои содржат комплексни задачи за реализација.

Ментори на тимот се професорите д-р Миха Буклески и д-р Марина Стефова од Институт за хемија при Природно-математичкиот факултет во Скопје и членови на Сојузот на хемичарите и технолозите на Македонија кои го организираат учеството на нашите натпреварувачи.

Покрај учениците Петар Мирчевски и Марио Ванчоски на меѓународната олимпијада по хемија успешно се претставија и средношколците Иван Костевски, ученик во „Славчо Стојменски“, Штип и Елена Живаљевиќ, ученичка во гимназијата „Јахја Кемал“, Скопје.